I hocke he vor mim Jahresbricht,

und proberes hiir eis mideme Gedicht.

Mengi göti Chlätterstund hei mer mid ise Chind ghäben,

und scheni Abentiir terfen erläben.

Hei Chnepf widerhold und ar Technik gfeeled,

hein wäsentli meh g`lached wa breeled.

Hein spilerisch glerd koordineeren,

und sech uf d` Üfgab konzentreeren.

Verantwortig ubernän,

Sicherheit dem anderen gän.

Ipackt i vil Spiel und Spass,

Und schon gid jedes Chind  vollgas.

D`Schiitüür hein mer ufen Bandspitz gmacht,

aber d`Sunnen hed is nid grad glacht.

Zum Üfiwäg Schneegstöber und Wind,

zum Appiwäg Brucharscht und blind.

Im Frehlig hed is dö meh Sunnen erwarted,

und mer hein grad im Berettli gstarted.

Mehrseillengeni chlätteren, Stend irichten,

umfädlen Abseilen da gits vil z prichten.

He und da wär den aschlessend no will,

es Apéro oder e Wurscht vum Grill.

Allen Gaschtgäber härzliche Dank,

fir immer feini Spiisen und Trank.

Ds Lager am Steingletscher ischt genial,

und ds Wätter wollt is göd dasmal.

Teamwork mid Gross und Chlin,

das sell isers Motto sin.

Bsunders ufen Gletschertag,

freue sich d Chind wenes blag.

Mer hein e super Gletscherspalt erblickt,

und alli hei sech göd dri gschickt.

Mit Iischhämmer de glatt Wand z`erzwingen,

oder mid dem Pickel es Kunschtwärk in Gletscher trimmen.

Am Steisee buuwen mer Steinmandleni,

wär hed da wohl di gschickteschten Handleni?

Zum zruggwäg no uberen Bach e Tyrolienne,

das fägt und geid allne scheen.

We immer gits bi Tom fein Znacht,

aschlessend wird no g`rätsled und vil glacht.

Es Bettmimpfeli und e Gschicht derzö,

und todmeed gäben de Chindleni Röh.

Z`monderscht gits no eis e Chlätterpartie,

und schon sin de dri Tag verbi.

Mid Zirkus starten mer ids Herbschtquartal,

am Trapez mid Clown und Leu das fägt total.

Der Jahresabschluss län mer mideme gmeetlichen Aben üsklingen,

und si gspannt was is ds niu Jahr wird bringen.

Härzliche Dank an alli Chind und Elteren

Sime Winterbärger & Hedi Wyss